ANHTE A PRAT HPE SAN SENG  SAN PRA LET HKAWM SA NGA SA GA

                  (Mt .5:12)  Kasa Mahte a Laika hta, “KABU HKINLUM  LET AW LAW NGA  MU”  nga nna Madu Yesu tsun da nga ai. Dai gaw Shi Madu hpe kam sham ai majaw, zingri zingrat hkrum, hkrum ai ni hpe n gun jaw  da airai nga ai. Madu Yesu gaw, anhte lu malu yawng hpe Shi hpe  bai sak jaw na, ra nga ai. Shi ra sharawng  ai hpe anhte nhtang jaw lu ai rai yang, Shi Madu anhte hpe hpan da ai yaw shada ai lam, hkumtsup sai rai nga ai. Anhte shing gyim masha ni munng, Madu a chyeju hpe kabu aw law let, chyeju bai htang  lu sai rai nga ai.

                  Madu Yesu gaw anhte marai hkum shagu sanpra ai masha tai na ra sharawng nga ai. Anhte myit su nna, ram daw kaja  ai ngu ai hte sha gaw, Shi myit n dik nga ai. Dai rai yang anhte gara hku san seng  san pra let asak hkrung nga ra ga ta?  Chyum  Laika a shawng na laika man hta nan Shi tsun da nga ai. “Nye a man kaw hkawm u; mara shagun n hkrum u-ga,” (Npawt. 17:1) nga nna Abraham hpe Madu Karai Kasang tsun da ai. Madu gaw anhte marai shagu hpe, “Tsawra ai myit masa hte, Shi a man e sanseng sanpra, ra n rawng hkra,” sak hkrung nga sa na matu, lata san da sai. (Ephe.1:4)

ANHTE RAU NGA NNA, ANHTE HPE N-GUN JAW AI SANPRA AI  MASHA NI

                  (Heb.12:1) “Anhte a man kaw du nga ai gat shingjawng poi hta, shakut sharang myit marai hte shang lawm na matu,” tsun da nga ai.

                  (Heb. 11:1 – 12:3) Hebre masha ni kaw shagun dat ai laika hta, Abraham, Sarah, Moshe, Gideon hte kaga kasi kaja tai ai ni law law hpe madun nna n-gun jaw da ai.

(Heb.12:1) “Summwi zawn hti n lu ai sakse tai sai ni,” nga nna n-gun mi alu shadum da ai.

                  ( 2 Tim. 1:5) hta, ndai hti n lu ai sakse tai sai ni kaw anhte a kaji kawoi, kanu kawa, tsawra ai ni mung lawm nga ma ai. Ndai sakse tai sai ni gaw, shinggyim gawng kya ai lam n nga ai ni n rai ma ai. Shanhte a gawng kya ai lam law law a lapran e, dingyang, shagrit shanem myit let  Madu ra sharawng ai hpe hkan galaw  nna, sanpra ai masha tai wa ai ni rai ma ai.

                  Ya aten hta Karai Kasang hte rau ningngai nga sai sanpra ai masha ni gaw, anhte hpe tsawra na matu, anhte hte rau nga na matu, ga sadi da ai ni rai ma ai. Shingran Laika hta makam masham a majaw sat kau hkrum ai sanpra ai masha ni a lam  ka da nga  ai. “Karai Kasang a mungga hte makam masham a majaw sat kau hkrum ai ni hpe, shanhte a, tawn hkungri npu e, nga yawng nga pra a Madu, sanpra dingman ai Wa e, galoi ten she sa jeyang daw dan ya na n ta?” nga nna nsen shaja let hpyi shawn nga ma ai . (Shrn.6:9-10). Anhte langai hpra hpe mung, “ Karai Kasang a jinghku ni grup rai, wang shinggrup da ya nga ai majaw; ngai langai hkrai n dang hpai ai lit hpe, ngai hkrai n hpai ra sai. Karai Kasang a sanpra ai masha ni ngai hpe, madi shadaw pawn ba ya na rai ma ai.”

                  A lu ai masha shatai ai poi “Beatification” hte Sanpra ai masha shatai ai poi “Canonization” lamang  ni galaw ai shaloi, San Pra ai masha ni gaw, makam masham hta magrau grang ai, tinang a asak hpe makam masham a majaw sat kau hkrum ai, htingbu wa a matu tinang a  asak hpe si du hkra ap nawng kau ai, myit masa ni hpe mu lu nga ai. Dai majaw shanhte gaw Madu Yesu a kasi kamang hpe hkan shatup ai ni, Hpung masha ni hpe yu makawp maga ai ni rai ma ai. Shanhte anhte hpe tut nawng garum shingtau ya nga ai majaw, Kabu hkinlum let aw law nga ga law.