Htingbu nta na sanpra ai masha ni

July 31, 2020

HTINGBU  NTA  NA  SANPRA  AI MASHA NI

                  Sanpra masha ni hte A lu ai masha ni a lam hpe, myit sumru yu nga nna sha, n ngut nga ai. Karai Kasang gaw, makam masham ngang ai masha law law a ntsa e, Chyoi Pra ai Wenyi a shaman chyeju jaw ya ai: “Num sha la sha law law hpe, marai langai hku nna sha n rai wuhpung wuhpawng  hku shachyoi shapra ya nga ai. Karai Kasang gaw Shi hpe wuhpung wuhpawng hku nna rau jawm hkungga tsawra daw jau na hpe ra sharawng nga ai.” Hkye hkrang la ai labau hta Madu Karai Kasang gaw, masha amyu hpan mi hpe hkye la ai lam mu lu ai. Anhte gaw wuhpung wuhpawng hta n lawm dingsa, “anhte” ngu ai ga hkum, rai n mai tsun nga ai. Hpa majaw nga yang Masha gaw dinghkrai langai sha rai nna n nga lu ai; Marai langai sha hkye la hkrum ai, ngu ai mung n nga ai. Masha shagu gaw shinggyim wuhpung wuhpawng hta lawm ai ni rai nga ai. Karai Kasang mung anhte hpe wuhpung wuhpawng hte nga na ra sharawng nga ai; dai shinggyim masha wuhpung wuhpawng hta, Karai Kasang Shi nan shang lawm mayu nga ai. Dai lam hpe shinggyim labau hta law law lang shadum ya sai.

                  Karai Kasang a kashu kasha ni gaw myit galu ai hte sak hkrung hkawm sa ra ai. Kanu kawa ni gaw, tinang a kashu kasha ni hpe tsawra myit hte pawn ba kawn kaba la ra ai.Tinang a dinghku bungli shakut shaja nga ai shaloi mani sum sai myi man galoi n mai tat kau ai. Machyi makaw hkrum ai, asak kaba sai hpung magam gun Jau, Ma Ma wuhpung ni, myit dum mai ai lam gaw, shanhte gaw, Shani shagu, asum n jaw ai sha ngang grin ai myit jasat hte sak hkrung nga ai, Buhkawm majen Je nga ai Nawku Hpung “Church militant” gaw shanhte nan re ai hpe myit dum ra ga ai.  Anhte a makau grup yin htingbu ni hta nan, Sanpra ai masha ni hpe mu lu ga ai. Shanhte gaw anhte a lapran e nga nna, Karai Kasang myit ra ai lam hkan galaw shakut nga ma ai. Shanhte hpe “ka-ang madang e nga ai Sanpra ai ni (the middle class of holiness) ” ni ngu mying shingteng jaw ga ai.

                  “ Hkristu Madu a myihtoi lit gun ni, Shi Madu sak hkrung nga ai hpe sakse hkam nga ai ni, makam masham myit kaba hte, tsawra myit kaba rawng ai ni, shagrit shanem let sak hkrung hkawm sa nga ai ni a prat hpe myit dat yu ga. Sanpra ai Teresa Benedicta of the Cross, gaw ning nga nna shadum da ai. “ Dam lada la ai, myihtoi hte seng ai lam ni, sanseng sanpra ai lam hte seng ai mahkrum madup ni gaw, shana nsin chyip re mahkrum madup kaw na pru wa ai rai nga ai. Ya na zawn byin wa na matu npawt de hpang ai lam hpe gaw kadai n mu nchye lu ai. Dai ahkyak dik ai mabyin hpe gaw, labau kaw n ka shalawm nga ai. Hpa majaw nga yang Chyoipra ai Wenyi e shabyin dat ai rai nga ai. Ndai makoi magap let byin wa ai Wenyi hpe gaw,   shadan shaleng ya ai nhtoi du jang sha, anhte chye lu na rai nga ga ai.” nga nna San pra ai Teresa Benedicta shadum ya sai.

                  Masha yawng hpe zinlum lu ai ahkyak dik ai lam langai mi gaw, Nawku Hpung a sanseng sanpra ai chyeju a majaw nga ai. Raitim Chyoi Pra ai Wenyi gaw, Kahtawlik Nawku Hpung kata kaw sha n ga, “ Hkristu a hpang hkan ai ni yawng hte rau, lam lam amyu my hku nna shi nga nga ai hpe madun ya nga ai.” “Kahtawlik, Orthodox, Anglican hte Protestant wuhpung shagu hta mung Madu Yesu a sakse tai nna du daw sai hkaw ai hkringhtawng sakse ni nga ma ai,” nga nna Sanpra ai Yawhan Pawlu matsun da ai. Matut nna Sanpra ai Yawhan Pawlu tsun ai gaw, “ Madu Yesu hpe sakse hkam ai marang e du daw sai hkaw lai wa sai Kahtawlik hpung, Orthodox hpung, Anglican hpung hte Hpunau Hkristan hpung masha ni gaw, shawa hte seng ai wunli wunkau kaba lu la ai lam nan rai nga ai, nga nna nna (2000) ning Jubali Shaning hta Colosseum ngu ai shara kaw Makam Masham Hpung ni a hkrum ra  zuphpawng “ecumenical commemoration” hta tsun shadum lai wa  sai.

Dai majaw Hkristu hta kam sham ai anhte wuhpung wuhpawng yawng gaw, kabu hkinlum let aw law nga ga law.