Hpaw hpang ai

Ningbaw       :       Madu Karai Kasang e, ngai hpe madi shadaw ya e.

Shawa            :       Madu e, ngai hpe alawan garum shingtau la rit.

Ningbaw       :       Kawa, Kasha, Chyoi pra ai Wenyi kaw hkungga shakawn nga u ga.

Shawa            :       Shawng ningpawt na hte maren, ya mung htani htana hkungga shakawn nga u ga law.

Mahkawn mangoi (Nawku mahkawn laika buk kaw nna, du sa ai ladaw na mahkawn langai ngai hpe hkawn mai ai)

Shakawn kungdawn ga (Psalmody)

Rau tsun na (1) (Antiphon)

Du sa ladaw: Jahtau garu let, masha ni hpe htawn tsun mu. Karai Kasang gaw du sa nna, anhte hpe hkye hkrang la na ra ai lam hpe myit mada ala nga mu.

(Shakawn Kungdawn 141: 1-9)

Manam pyaw ai baw a wan hkut gaw, Chyoi pra ai ni a akyu hpyi ga hte rau, Karai Kasang a man de mawng lung wa ai. (Shingran 8:4)

Karai Kasang e, ngai nang hpe shaga nga nngai; Ngai kaw alawan wa rit;

Nang hpe ngai shaga nga yang, nye a nsen madat mara ya e.

Ngai akyu hpyi ai ga, na a man e, manam pyaw ai mura zawn,

Ngai lata ladawn ai gaw, shana na hkungga zawn, rai nga u ga.

Karai Kasang e, nye a n-gup hpe sin ya e; Nye a nten chyinghka pat da ya e.

Nye a myit n shawp ai amu n maw u ga; Kaman lila galaw ai masha ni hte rau,

Tara n hkan ai bungli ngai mung n galaw n ga; Shanhte a reng ai shat hpe, ngai n sha lawm u ga.

Ding hpring ai wa gaw ngai hpe kayat u ga; dai gaw chyeju rai nga ai; Ngai hpe sharin ya u ga;

dai gaw baw chya ai namman zawn rai nga ai; Nye a baw dai namman hpe n hkum kau u ga;

masha ni a n hkru ai malai, Ngai akyu naw hpyi nga nngai. Shanhte a tara agyi ni pyi,

nlung hta agrawp kau ai hkrum ma yang, “Katsan ga a mahka e anhte a nrut nra ni ayai nga timung,

Dai gaw, aga hpe htu nna, galau kau ai hte bung nga ai,”Nga nna, ngai shapyaw ai ga hpe, shanhte na ma ai.

Kaning rai nme law, nye a Madu Karai Kasang e, Nye a myi nang hpe a mada nga li ai;

Nang hpe ngai myit mada nga nngai, Nye a asak sumri hpe hkum dawm kau ya e.

Nye a matu hkam ai mahkam hte, N hkru ai bungli galaw ai ni a nbyeng hta na, ngai hpe shalawt dat e.

Kawa, Kasha, Chyoi pra ai Wenyi kaw hkungga shakawn nga u ga.

Shawng npawt na hte maren, ya mung, htani htana hkungga shakawn nga u ga law.

 

Shakawn kungdawn ga (Psalmody)

 Rau tsun na (2) (Antiphon)

Du sa ladaw: Jahtau garu let, masha ni hpe htawn tsun mu. Karai Kasang gaw du sa nna, anhte hpe hkye hkrang la na ra ai lam hpe myit mada ala nga mu.

Du sa ladaw : Yu mu, Madu gaw Shi a chyoi pra ai ni shinggrup nna du sa na ra ai. Dai shani hta nhtoi shingkang kaba dan pru na ra ai. Alleluia

                                                                                                              (Shakawn kungdawn 142)

Ndai lam ni mahkra hpe Shi nni nkri hkrum nga ai shaloi jahpring shazup ya sai! (San Hilary)

Nye a nsen hte ngai Madu hpe jahtau nga nngai: Nye a nsen hte ngai Madu hpe akyu hpyi nga nngai.

Shi a man e nye a aru ara ngai ru kau na nngai, Shi a man e ngai ru tsang ai lam ngai tsun dan na nngai.

Nye a wenyi gawng run nga ai shaloi e, Nang nye a lam hpe chye nga ndai;

Ngai sa wa ai lam hta e, shanhte mahkam up da mu ai. Nye a hkra maga de mada yu u,

Ngai hte hkau chyap ai wa n nga ai; Ngai shingbyi shara hten wa sai,

Nye a myit masin hpe lahpawt ai wa n nga ai. Karai Kasang e, ngai nang hpe jahtau nga nngai;

Ngai shingbyi shawung shara hte, Hkrung nga ai ni a ga hta e nye a kambum, Nang rai nga ndai,

nga nna ngai tsun  nga nngai. Ngai matsan mayan nachying hkrum nngai majaw,

Ngai hpyi jahtau ai hpe matsing la ya e; Hkan shachyut ai ni kaw na ngai hpe mawai la e;

Shanhte gaw ngai hta n-gun grau ja ma ai.

Na a amying ning sang hpe ngai shakawn nga lu n ga, Dai htawng hta na nye a myit masin hpe shapraw dat u;

Shing rai nang ngai hpe chyeju galaw ai majaw, Ding man ai ni ngai hpe bawp nga lu na mara ai.

Kawa, Kasha, Chyoi pra ai Wenyi kaw hkungga shakawn nga u ga.

Shawng npawt na hte maren, ya mung htani htana hkungga shakawn nga u ga law.

 

Du sa ladaw (Rau. 2): Yu mu, Madu gaw Shi a chyoi pra ai ni shinggrup nna du sa na ra ai. Dai shani hta nhtoi shingkang kaba dan pru na ra ai. Alleluia.

Du sa ladaw (Rau. 3): Madu gaw hpung shingkang atsam kaba hte du sa ai rai nna, asak hkrung mahkrung yawng hte gaw Madu hpe mu lu na mara ai.

Hkristu, Karai a shangun ma

                                                                                                                                             Canticle     (Philipi 2:6-11)

Shi gaw Karai Kasang a ahpraw nsam hta pra nga timung,

Karai Kasang hte maren rai nga na shingjawng kashun ai hku n nawn ai.

Tinang dai shagawm kau nna, mayam a ahpraw nsam dagraw let,

Shinggyim masha hte bung hkra tai wa sai;

Shing rai, masha a gawng shing-yan lang let shi hkum hpe shi shagrit kau  nna,

Si ai du hkra madat mara nga ai. Gaja wa, wudang hta si ai du hkra madat mara nga ai.

Dai re ai majaw, Sumsing Lamu lahta tang na, dinghta tsang na hte  Katsan ga na lahput

yawng mayawng hte gaw, Yesu a mying ning sang hte hputdi nna,

Yesu Hkristu gaw Madu rai nga ai, nga nna shinglet yawng mayawng hte gaw,

Kawa Karai Kasang a hpung shingkang a matu mara kajai gumhkawng nga mu ga,

Karai Kasang gaw shi hpe shagrau nna, amying shingteng yawng mayawng hta,

Grau ai amying ning sang jaw da wu ai rai nga ai.

Kawa, Kasha, Chyoi pra ai Wenyi kaw hkungga shakawn nga u ga.

Shawng npawt na hte maren, ya mung htani hta na hkungga shakawn nga u ga law.

 

Du sa ladaw (Rau. 3): Madu gaw hpung shingkang atsam kaba hte du sa ai rai nna, asak hkrung mahkrung yawng hte gaw Madu hpe mu lu na mara ai.

 

Chyum mungga                                                                                                                  I Htesaloni 5: 23-24

                Ngwi pyaw ai a npawt Karai Kasang nan nanhte hpe hkum dinghkum shachyoi shapra myit ga; anhte a Madu Yesu Hkristu bai du sa ai shaloi e, nanhte a wenyi, myit masin hte hkum hkrang ting gaw, mara n kap hkra bau nga u ga. Nanhte hpe shaga la ai wa gaw kangka nga ai rai nna, ndai lam hpe mung galaw na ru ai.

 

Ningbaw       :       Ya hti ai gaw, Karai Kasang a mungga rai nga ai.

Shawa            :       Karai Kasang hpe chyeju dum nga ga ai.

 

Shagrau aw law ga (Benedictus ant.)

S      : Madu e, na a ngang kang ai tsawra myit anhte hpe madun ya rit.

N     : Na a hkye hkrang la ai lam mung, anhte hpe jaw ya rit. (S)

N     : Kawa, Kasha, Chyoi pra ai wenyi kaw hkungga shakawn nga u ga. (S)

 

Shakawn mahkawn gadun (Short responsory)

Laban (1): Yu mu, Karai Kasang a mying ningsang gaw tsan ai shara kaw na du sa ra ai. Shi a shingkang shingwang gaw mungkan ting pri rai nga ai.

Maria a mahkawn ga (Magnificat) Luka 1: 46-55

Nye myit masin dai Madu hpe shagrau li ai; Nye wenyi mung ngai hpe hkye la ai

Madu Karai Kasang hta kabu gara li ai; Shi a mayam jan a myit gyip ai hpe shi mada yu nu ai;

Yu u, ya kaw nna shu mashi shu masha prat dingsa, ngai hpe a lu ai, ngu na mani ai.

Atsam rawng ai wa gaw, ngai hpe galu kaba ai galaw ni ai; Shi a amying ning sang chyoi pra lu ai;

Shi hpe hkrit kamyin ai ni a ntsa e, shu mashi shu masha du hkra, Shi a matsan dum ai myit a nga nga ai.

Shi a lahpum hte atsam pra di nu ai; Tinang kraw e maw ai hku hta gumrawng nga ai ni hpe,

shi shabra kau nu ai. Du magam ni hpe tingnyang na jahkrat kau nna, myit gyip ai ni hpe shagrau ya nu ai.

Kawsi hkrum ai ni hpe kaja ai hte jahkru shakat nna, Sut su ai ni hpe kaman dat dat nu ai.

Anhte a ji wa ni hpe tsun da sai hte maren, Abraham hte shi a kashu kasha ni hpe

Prat dingsa matsan dum ai lam dum nga na matu, Shi a shangun ma Israela hpe lanu lahku  nu ai,

Kawa, Kasha, Chyoi pra ai Wenyi kaw hkungga shakawn nga u ga.

Shawng npawt na hte maren, ya mung, htani htana hkungga shakawn nga u ga law.

 

Shawa akyu hpyi ga (Intercessions)

Laban (1 & 3)

N     : Karai Kasang a kasha gaw hpung shingkang kaba hte du sa ra ai. Masha yawng mayawng gaw shi a myi man hpe mu lu nna, nnan bai shangai na mara ai.

S      : Madu Yesu e, anhte kaw du sa na hkum lanyan e.

N     : Madu gaw, anhte hpe hpaji byeng ya nnan, chye na ai lam nnan, ningmu nnan ni la sa ya na ra ai. (S)

N     : Madu gaw, anhte hpe kabu gara shiga, asak aprat hpe galai ya na atsam mung la sa ya na ra ai. (S)

N     : Madu gaw, anhte hpe teng man ai lam la sa ya nna, anhte a Kawa Karai Kasang hpang de sa wa ai lam madun ya na ra ai. (S)

N     : Numsha kaw na shangai nhtawm, nang gaw anhte a hkum hkrang hpe htani htana asak hte ngwi pyaw simsa lam hpe hpaw ya na ra ai. (S)

 

Madu a akyu hpyi ga

Hpang jahtum akyu hpyi ga (Concluding prayer)

Laban (1): Mahkra dang chye ai Wa Karai Kasang e, Madu Hkristu bai du sa ai shaloi, na a chyeju hte anhte hkam la lu sai mai kaja ai akyu ara a apu asi ni hpe lang let, nang hpe hkap tau lu na ahkang jaw ya rit. Anhte hpe San Pra ai ni a wuhpung hta hkap la nna Sumsing lamu mungdan de woi wa na matu, htani htana ahkrung nga nna up hkang nga ai, anhte a Madu Hkristu a marang e, hpyi nem nga ga ai.

Shaman ai ga:

Mahkra dang chye nna, hpung shingkang arawng sadang hte hpring nga ai Wa Karai Kasang gaw, anhte hpe matsan dum let, shut hpyit mara raw dat ya nna, htani htana asak de woi wa mi ga law.

S:    Amen.

N     :       Madu Karai Kasang Wa hpe shakawn kungdawn nga ga law.

S      :       Karai Kasang hpe chyeju dum nga ga ai.